VIGAN CITY – Awaten inton December 2 iti agdama a tawen ni Juan Carlo Donato Antonio nga agtawen ti dua pulo ket innem a taga- Pagpartian, Vigan City iti kangatoan a pammadayaw a maiteted kadagiti agturpos ti graduate studies idiay Naresuan University, maysa kadagiti top government university ti Thailand gapu ta naala na iti 95 points manipud ti 100 points nga iskor iti thesis writing nga umuna iti pakasaritaan iti nasao a pagadalan.
Ti kangatoan a distinction award nga awaten to ni Antonio ket iyawat to a mismo ni Royal Highness Princess Maha Chakri Sirindhorn kenkuana.
Ni Antonio ket dati a nagisuro ti English idiay University of Northern Philippines ti dua ket gudwa a tawen ngem napagasatan a naala idiay Thailand nga agisuro met laeng iti English language.
Bayat iti panagisursuro na ti English Language, nagbasa isuna ti Master of Arts in English major in Applied Linguistics idiay Naresuan University.
Kinunana, uray nu napintas iti agisuro iti ballasiw taaw, kayat na iti agsubli idiay UNP tapnu isuro na kadagiti kailyan na.
Innayon na a ti kinarigat iti biyag ken ti pamilya na iti nagserbi nga inspirasyon na tapnu igaed na iti agadal ken magun-od na dagiti arapaap na iti biyag.
