Nagballaag ti International Criminal Court (ICC) Trial Chamber III Presiding Judge Joanna Korner kadagiti counsel ni dati a Pres. Rodrigo Duterte maipanggep ti panangted ti sarita iti media.
Iti maikadua nga status conference, pinalagipan ni Korner ti defense, prosecution ken victims’ counsels a saan laeng a rumbeng nga agbalin a nadayaw iti korte no diketdi agannad iti aniaman a sarita a mairuar iti media.
Dinakamat ti hukom ti immunan nga insidente a nagkomentoan iti media ni dati a defense counsel Nicholas Kaufman maipanggep ti pangngeddeng ti ICC Appeals Chamber iti isyu ti hurisdiksyon, iti baet a nagballaag ti korte.
Impaganetgetna nga aniaman nga isyu ket rumbeng a direkta a maipasango iti korte ken saan a babaen iti media.
Pinalagipanna pay ti media a siguradoen a husto ken patas ti panagreport ti proceedings ken liklikan ti espekulasyon iti baet ti nakaru nga interes ti publiko ken panagwaras iti madi nga impormasyon iti social media.
