VIGAN CITY – Tallo a lallaki ti nakemmeg iti agsina a search warrant operation idiay Barangay Paypayad, Candon gapu ti panaglabsingda iti Republic Act 10591 wenno ti Comprehensive Firearms and Ammunition Act.
Immuna a nakemmeg ni Clodelio Briosos, agtawen iti limapulo ket dua a taga-Bangued Abra ngem temporaryo nga agnaed iti Brgy Patpata 1st, Candon.
Naala iti uneg ti pagtaenganna ti uppat a piraso ti live ammunition ti Caliber 5.56 rifle, dua a live ammunition ti saan pay nabigbig a paltog ken dua a piraso ti empty cartridge ti caliber 9 mm.
Simmaruno da Mizardo Depaysa, agtawen iti duapulo a tubo iti Brgy Budac ,Suyo ken ni Terryboy Banay, agtawen iti tallopulo ket uppat, tubo iti Barangay Lidlidda ngem temporaryo nga agnaed iti Barangay Paypayad.
Naala manipud iti kubo a pagtaltalinaedan dagiti suspek ti maysa a magazine ti caliber 45 pistol nga adda ti nakaikabil nga inem a live ammunition na.
Addan iti kustodia ti Candon Police Station dagiti suspek tapno dumalan iti husto a proseso.
