Nagpalawag ti Ilocos Sur Highway Patrol Group iti husto a panagaramat iti solid white line iti kalsada kasaruno ti pannakatiliw ti maysa a local chief executive gapu iti mapapati a pananglabsingna iti traffic rules.
Iti pannaki-uman ti Bombo Radyo Vigan ken ni Police Major Jordan Sambo, ti solid white line ti agserserbi a boundary dagiti dua a direksion para kadagiti lugan a dumalyasat.
No adda solid white lane, kayatna a sawen ket adda sagdua a linya ti agsinnumbangir a kalsada, ket no adda iti kannawan a paset ti motorista, nasken nga agtalinaed iti linyana ken saan a lumabes iti solid white lane gapu ta maibilang daytoy a counterflow.
Impaganetget ni Sambo nga obligado dagiti motorista a sumurot kadagiti road sign ken traffic markings, adda man wenno awan ti traffic enforcer iti lugar.
Kunana nga adu pay a motorista ti matiltiliwda gapu iti saanda a panangsurot kadagiti naituding a linteg trapiko, uray pay no adda driver’s license-da.
Inlawlawagna pay a saanen a ballaag laeng ti maipataw iti umuna a gundaway a panaglabsing no di ket adda dagus muelta a masingir.
