Saan a mangted ti aniaman a dokumento ken impormasyon iti International Criminal Court wenno ICC ti House Quad Committee mainaig iti imbesigasyonda kadagiti kaso ti extra judicial killings iti salinong ti war on drugs iti Duterte Administration.
Ti nasao a banag ket takder ni Quad Committee over-all chairman ken Surigao del Norte 2nd District Rep. Robert Ace Barbers iti baet iti proceedings ti ICC ken ni dati a President Rodrigo Duterte gapu ti crimes against humanity.
Inkalintegan ni Barbers a saan a makitinnulong ken saan a makikammayet ti House Quad Committee iti ICC gapu ta saanen a miembro iti Pilipinas.
Kinunana pay a saanen nga obligado ti komite nga agipasa kadagiti dokumento ken sinapataan a sarita iti ICC.
Innayonna a mabalin a maaddaan ti access iti ICC iti agduduma a social media platforms ta adda idi ti live iti sangapulo ket tallo a panagdenggeg nga insayangkat ti House Quad Committee mainaig iti nadara a laban kontra illegal a droga nga insayangkat iti napalabas nga administrasyon.
