Nagipila iti pormal a reklamo ti anti-corruption group a Wag Kang KuCorrupt kontra ken ni Sen. Bato dela Rosa iti Senate Committee on Ethics and Privileges gapu iti mapapati a nasurok tallo a bulan a panagliwayna iti opisyal nga akemna.
Iti reklamo, impaganetget iti grupo ti nabayagen a saan a panagserrek ti maysa a nakatugaw a senador ket maibilang a dereliction of duty ken panagabuso iti talek nga inted iti publiko.
Kinunada a saan a maawat ti agtultuloy a panagawat ti kompensasyon ti maysa nga opisyal ti gobierno no saanna nga ar-aramiden ti ak-akemanna a mandato.
Ti nasao a banag ket mabalin nga agresulta iti panaglabsing ti akem nga agserbi a napudno ken nasayaat.
Maipalagip a saanen a nakita iti publiko ni Dela Rosa manipod pay laeng idi November 2025 kasaruno dagiti report maipanggep iti imbestigasyon iti International Criminal Court iti kaso a crimes against humanity nga adda pakainaigan iti kampania kontra droga ti Duterte Administration.
