VIGAN CITY – Agtultuloy ti hot pursuit operation dagiti pannakabagi ti linteg ti Magsingal Police Station kadagiti naglibas a suspek a nangpapatay ken ni Brgy. Capt. Feliciano Tabura idiay Namalpalan, Magsingal nga agmanmaneho iti motorsiklona idi pinaltuganda ti bukotna a puon ti nakatayanna.
Namin tallo a daras a nakangngeg dagiti residente iti putok ti paltog ket saanda a ninamnama a ti kapitanda ti napaltugan.
Iti pannaki-uman ti Bombo Radyo Vigan ken ni Pol. Capt. Joel Castillo, hepe ti Magsingal Police Station, mapapati nga aglemlemmeng laeng dagiti suspek iti nasamek a paset ti Panay Sur ta nasabet dagiti kameng ti Sto. Domingo Police Station a timmulong a nagresponde dagiti mapapati a suspek a nakamotorsiklo ngem insigida a naglibasda met laeng.
Malaksid ti dayta, awan ti aniaman a nakairamananna a riri ta patien pay dagiti kalugaranna a maysa a nasayaat a tao.
Nupay kasta, nainget a maimbestigaran no siasino dagiti suspek ken no ania iti motiboda iti napasamak.
