Naikkat iti puesto ni Eastern Police District Director Brig. Gen. Villamor Tuliao gapu iti mapapati nga iregularidad iti pannakakemmeg dagiti dua a Chinese nationals babaen iti units-na kas kinuna ti Philippine National Police (PNP).
Segun ken ni PNP Chief Gen. Rommel Marbil, saan laengen a maipanggep iti rogue officers ti nasao a banag nu diketdi ti pannakapaay iti lideratorana.
Kinunana a nu nadadaelen ti disiplina ket nangrugi dayta iti ngato ta masapul a dagiti lider ket ipaayda ti kangatoan nga standards iti accountability.
Binilin ni Marbil ti Internal Affairs Service ken ti National Capital Region Police Office a mangisayangkat iti imbestigasyon ket impaganetgetna a maipila ti kaso ken maikkat dagiti opisyal a mapaneknekan a karaman.
Segun kadagiti polis, napasamak iti insidente idi Mierkules ta kinemmeg ti Eastern Police District Special Operations Unit personnel dagiti dua a Chinese national idiay Las Piñas City babaen ti warrant iti mapapati a panaglabsing ti firearms regulations.
Iti police investigation report, innala dagiti operatiba iti nasurok minilion a kuarta a local ken foreign currencies, luxury bags, adu a relo, alahas ken cellphone ket naammoan a saanda a nagaramat ti body-worn cameras kas paset koma ti operasyon.
