Nagpanawagan dagiti Health Advocacy Groups, kas iti Healthy Philippines Alliance, Health Justice, ken Imagine Law, kadagiti agpapanday-linteg a mangipasa iti bill a mangiduron kadagiti pakdaar maipapan kadagiti naipakete a taraon.
Gagem ti singasing a maipakaammo ti publiko maipapan kadagiti peggad nga ited dagiti naipakete ken processed food.
Segun ken ni Beverly Samson, Project Manager ti Health Justice Philippines, makatulong daytoy tapno maksayan ti bilang dagiti Pilipino nga agsakit gapu iti pannanganda kadagiti nasao a produkto.
Dagiti naipakete ken processed food ket kadawyan nga addaan iti nangato a level ti asukar, sodium, ken saturated fats, a saan a nasayaat iti salun-at a kas kadagiti instant noodles, processed oats, cheese spread, instant coffee, soy milk, ken biskuit.
Dagiti sakit a patauden dagiti unhealthy processed food ket pakairamanan ti cancer, diabetes, hypertension, stroke, obesity, ken dadduma pay.
Inyunay-unay ni Dr. Jaime Galvez Tan, dati a Health Secretary ken Lead Convenor ti Healthy Alliance Philippines, a makapadanag ti panagadu ti bilang dagiti ubbing a maaddaan iti non-communicable diseases.
