Kiniddaw ti grupo dagiti mangngalap a Katipunan ng Artisanong Mangingisda sa Pilipinas a paingeten ti gobierno ti pagilian ti negosasyonda iti China tapno nawayada manen a makakalap iti kabaybayan a sakupen ti West Philippine Sea.
Iti pannaki-uman ti Bombo Radyo Vigan ken ni Roberto Ballon, Chairperson ti Kilusan ng Artisanong Mangingisda sa Pilipinas, dakkel a pukaw kadakuada iti kaadda dagiti barko ti China nga agbambantay iti mapagin-innagawan a teritoryo ta saanda a mapalpalubosan nga agkalap nangruna iti paset ti Bajo de Masinloc a pangnamnamaan dagiti kaaduan a Pilipino a mangngalap iti pagbiaganda.
Innayonna a gapu ti pannakaapektarda iti dayta a pasamak ket bimmassit ti sapulda ket uray adda ited ti gobierno nga ayuda, limitado met laeng ken saan nga amin a mangngalap ket mairanud.
Nupay kasta, ipampanawagan ti grupo a pagpatangan a nasayaat no ania dagiti parikut iti nagbaetan ti dua a pagilian ket saan idan a mairaman ta maapektaran met iti pagsapulanda.
