Impanakkel ni Ilocos Sur Governor Jerry Singson ti panagkaykaysa dagiti Ilocos Surian ken ti 10-point agenda ti administrasionna kagiddan ti panagbalin a top-revenue earning province ti probinsia iti intero a pagilian idi 2024, maibasar iti Commission on Audit.
Umabot iti P9.721 billion ti pastrek ti Ilocos Sur – 140.68 percent ti ngimmatoanna manipud idi 2023.
Iti pannaki-uman ti Bombo Radyo Vigan ken ni Singson, dakkel ti nagbalin nga akem dagiti mannalon ti tabako iti probinsia tapno bumuslon ti apit ken dumakkel met ti maawat nga excise tax manipud iti Republic Act 7171 wenno Virginia Tobacco Farmers Act.
Malaksid dayta, kinunana pay a napintas ti patakaran dagiti mayor iti nadumaduma a Local Government Unit iti benneg ti negosyo isu a nasayaat met ti nagresultaan ti National Tax Allocation a maysa a rason ti dimmur-asan ti probinsia.
Inkari ti gobernador nga aramiden amin ti administrasionna tapno maipaay ti kasapulan dagiti agindeg ken mapagtalinaed ti nadur-as nga ekonomia.
Malaksid dayta, impannakkelna pay a corruption-free ti probinsia.
Manipud kadagiti 82 a probinsia, ti Ilocos Sur ti umuna iti listaan a kaaduan iti pastrek, inartapanna ti Bulacan a dati nga akin-iggem iti record.
