Marigatan ti gobierno a mapaawid dagiti Overseas Filipino Worker a nagkiddaw a ma-repatriate iti baet ti kumarkaro a sitwasion iti Middle East.
Segun ken ni Presidente Ferdinand Marcos Jr., umabot iti 1,460 nga OFW ti nangipeksa ti kalikagumda a mapawid ngem saan a makatignay ti gobierno gapu ta awan ti biahe dagiti eroplano iti agtultuloy a panagbomba ken drone attacks.
Innayon ni Marcos a saan a makaipatulod ti gobierno ti mangsukon kadagiti OFW gapu iti peggad ken nakarikep nga airport, ken naideklara ti no fly zone gapu iti agtultuloy a panangipatayab iti missile ti Iran ken Israel.
Karaman kadagiti OFW a kayatda ti agpa-repatriate ket manipud Iran, Israel, Jordan, Bahrain, Dubai, ken Abu Dhabi.
Delikado pay ti land travel ta likliklikan ti friendly fire isu a nabalakadan dagiti OFW nga agtalinaed kadagiti shelter ken makikammayet kadagiti embahada ken konsulado.
