Inallukoy ni Senador Win Gatchalian ti Department of Migrant Workers a rugian ti panagsagana para iti repatriation wenno panangpaawid kadagiti overseas Filipino Workers idiay Iran, Israel, ken dadduma pay a pagilian iti Middle East gapu iti kumarkaro a rinnupak iti rehion.
Segun ken ni Gatchalian, ti AKSYON Fund iti salinong ti DMW ket maar-aramat para iti repatriation dagiti OFW ken dadduma pay a klase ti insigida a tulong para kadakuada.
Ninayonan ti Finance Committee ti pondo ti AKSYON Fund iti P800 milion – nagbalin a P2 billion ti dati a P1.2 billion.
Innayon ti DMW nga umabot iti 2.43 milion dagiti Pilipino iti Middle East.
Kabayatanna, inallukoy pay ti senador ti Land Transportation Regulatory and Franchising Board nga insigida nga agsagana para iti naannayas ken naipampanawen a panangipatungpal iti Pantawid-Pasada program iti baet ti manamnama a panagpangato manen ti presio ti langis.
