VIGAN CITY – Nakasagana ni dati a Health Secretary ken agdama nga Iloilo 2nd District Rep. Janette Garin a makidebate ken ni Buhay Partylist Rep. Lito Atienza inaig iti isyu ti vaccination program iti gobiyerno.
Ti pannaki-uman ti Bombo Radyo Vigan ken ni Garin, nadakamat na nga adda dagiti ebidensiya nga iggem na mangpaneknek a palso dagiti nadakdakamat ni Atienza idiay Kamara inaig iti isyu ti dengvaxia ken tetanus toxoid a mapapati a nagbutngan iti publiko isu a saan da a nagpabpabakuna ken rimsuwa dagiti outbreak iti naduma-duma a sakit.
Segun ti dati a health secretary, dagiti palso nga impormasyon a kas kadagiti nadakamat ti pada na nga agpanpanday linteg iti pudno a rason nu apay nga agbuteng dagiti tattao nga agpabakuna.
Kabayatanna, ti met laeng pannaki-uman ti Bombo Radyo Vigan, inpapilit ti Buhay Partylist Rep. a ti dati a health secretary iti rumbeng na a mapabasol kadagiti nasao nga isyu ta isu idi iti nakatugaw a health secretary.
