Inaprubaranen ti House Ways and Means Committee ti gakat tapno maipangato ti P350,000 ti agdama a P250,000 a gatad ti pakabuklan a sueldo iti makatawen a saan a mapatawan iti buwis.
Karaman a naaprubaran ti gakat tapno i-exempt ti babassit a negosyo wenno microenterprises manipod 2% Minimum Corporate Income Tax (MCIT).
Nakaipauneg dayta iti sumagmamano a linteg karaman ti House Bill No. 10345 ken 10346 nga impila da House Speaker Faustino “Bojie” Dy III ken Majority Leader Ferdinand Alexander “Sandro” Marcos.
Dagiti nasao a gakat ket kasaruno iti idurduron a reporma iti panagbuwis ni Pres. Ferdinand Marcos Jr. iti State of the Nation Address-na a gagem a makissayan ti rigat dagiti mangmangged ken babassit a negosyante.
Segun ti chairman ti komite a ni Marikina 2nd District Representative Miro Quimbo, kalikagum ti nasao a tax reform package a matulongan tunggal Pilipino iti baet ti umad-adu a gastos iti inaldaw-aldaw a panagbiag gapu iti ngumin-ngina a presyo dagiti magatang.
