Idurduron iti Kamara ti gakat a mangpapigsa ti proteksyo kadagiti ubbing kontra iti peggad nga ipaay ti social media.
Nakaipauneg ti House Bill No. 9965 wenno gakat a Children’s Social Media Safety Act nga impila da House Speaker Faustino “Bojie” Dy III, Senior Deputy Speaker Ferdinand Hernandez, ken Majority Leader Rep Sandro Marcos.
Iti salinong tigakat ket maparitan dagiti ubbing nga agtawen iti sangapulo ket tallo agpababa nga agaramat iti social media.
Kadagiti met nalablabes iti sangapulo ket tallo a tawen agingga sangapulo ket walo ket makaaramat ti social media no laketdi adda iti pammalubos ken pannarabay dagiti nagannakda wenno guardian.
Segun ken ni Speaker Dy, saan a gagem ti gakat nga ipaidam kadagiti ubbing ti teknolohia ta dakkel iti maitulongna dayta iti panagadal, komunikasyon ken panagsursuro.
Rumbeng laeng a masigurado a mayannatup iti panagaramat iti tawenda ken rumbeng a maaddaanda iti umdas a tarabay iti nagannak tapno saan a mangitunda iti peggad.
