Saanen a naklaat ti dati a kongresista iti panangiruar ti International Criminal Court iti redacted public version ti dokumento a nakaipalaonan ti kaso kontra ken ni dati a Presidente Rodrigo Duterte.
Maibasar iti dokumento, ‘individually criminally responsible’ ni Duterte gapu iti crimes against humanity, kangrunaan ti murder ken attempted murder idi November 2011 ken March 2019.
Iti pannaki-uman ti Bombo Radyo Vigan ken ni dati a Magdalo Partylist Rep. Gary Alejano, manamnaman a kasta ti agbalin a tignay ti ICC ta nabayagen a nakapempen ti kaso, naiserbi ti warrant of arrest ken nakemmeg ti dati a presidente.
Karaman kadagiti tallo a bilang ti kaso a naipila kontra iti dati a presidente ti pammapatay idiay Davao City kabayatan ti panagtakemna kas mayor; pammapatay kadagiti High Value Target iti pagilian kabayatan ti panagtakemna kas presidente; ken ti pammapatay ken gandat a pammapatay iti Barangay Clearance Operation iti pagilian kabayatan met laeng ti panagtakemna kas presidente.
Ngem segun ken ni Alejano, saan laeng a nasken nga agpatingga kadagita a kaso ti sangwen ti dati a presidente ta adu pay dagiti kontrobersial nga isyu a nangitunda iti panagbuteng dagiti umili.
Kabayatanna, saan a patien ti dati a kongresista a saan a ‘fit to trial’ ti dati a presidente ta daytoy ket rason laeng ti abogadona a ni Atty. Nicholas Kaufman gapu ta dakkel ti maibaybayad kenkuana.
Kunana pay a nalaing laeng nga agdrama ti dati a presidente ngem saanna kayat a sawen a mapunas metten dagiti crimes against humanity a napasamak iti administrasyonna.
