Mangnamnama dagiti Filipino supporter ni dati a Presidente Rodrigo Duterte idiay Netherlands a maipangabakna ti kaso a sangsangwenna iti International Criminal Court.
Dayta ket kalpasan ti pannakakemmeg ni Duterte ta nangiruar ti ICC iti warrant of arrest gapu iti ‘crime against humanity’ a mainaig iti nadara a war on drugs idi ti administrasyonna.
Iti pannaki-uman ti Bombo Radyo Vigan ken ni Bombo International Correspondent Giovanni Rey Nisnisan, patienda nga iligal ti pannakaibiahe ti dati a presidente iti nasao a pagilian ta awan ti due process a nasurot.
Inton Sabado ti naituding a panagturong dagiti Filipino supporter iti lugar nga ayan ni Duterte tapno ipakita ti suportada ken ipanawagan ti pannakaisublina met laeng iti Pilipinas.
Nupay kasta, impasigurado ni Nisnisan a nasayaat met ti pannakatrato ti dati a presidente idiay Netherlands ta impaayanda met dagiti naan-anay a kasapulanna kas kadagiti kawes ken taraon.
