Umaboten iti 5 a gold medal ti nagun-od ti swimmer a ni Makayla Fetalvero manipud iti Schools Division-Ilocos Sur iti agtultuloy a Region 1 Athletic Association Meet idiay Candon City, Ilocos Sur manipud kadagiti 4 nga individual swimming event ken 1 a relay.
Dayta ket kalpasan a nagkampeon iti swimming event secondary division ken naartapanna ti record-na iti R1AA 2025.
Iti pannaki-uman ti Bombo Radyo Vigan ken ni Fetalvero, proud latta ti riknana uray no saanna a nagun-od ti oras a kayatna.
Karaman iti panagsaganana nga inaramidna para iti event ti panagsanayna iti binigat ken minalem, a buyoganna iti balanse a nutrision.
Nagyaman met kadagiti mangsupsuporta kenkuana kas ti pamiliana, dagiti mangisursuro ken iti Namarsua a bigbigbigenna a pagtataudan ti pigsa ken pokusna.
Iti agdama, kalikagum ni Fetalvero ti makasali iti international swimming competition.
Kabayatanna, sipapannakkel ni coach Ronalene Reolalas, agraman ti Great Heights Learning Center a pagbasbasaan ni Fetalvero iti panagballigina.
Segun ken ni Reolalas, napateg unay nga adda inaldaw a training-da tapno ad-adda pay a lumaingda.
Pagyamananna met ti Ilocos Sur Provincial Government ken ti SDO-Ilocos Sur iti suporta nga impaayda kadagiti atleta.
