Pinasingkedan ni Senate President Pro Tempore Panfilo Lacson a nangipasan ni dati a Bulacan Assistant District Engineer Brice Hernandez kadagiti computer, dokumento, ken dadduma pay nga ebidensia a mangpaneknek iti mapapati a pannakairaman ti sumagmamano nga agpanpananday linteg maipanggep kadagiti anomalous flood control project.
Maipalagip a temporario a nawayaan ni Engr. Hernandez idi Sabado, Setyembre 20, manipud iti pannaikabalodna babaen iti Senado tapno ma-secure-na dagiti ebidensia, a naselioan itan bayat a maur-uray ti pormal a pannakasukisok.
Immunan nga innagan ni Hernandez da Senador Jinggoy Estrada, Senador Joel Villanueva, ken dati a Caloocan Representative Mitch Cajayon-Uy a mapapati a nakaawat iti kickback, banag a pinaglibakan dagiti tallo nga opisial.
Kabayatanna, manamnama a maawis ni dati a Department of Public Works and Highways (DPWH) Secretary Manuel Bonoan ken DPWH Undersecretary Roberto Bernardo a tumabuno iti sumaruno a Senate Blue Ribbon Committee hearing inton Setyembre 22 tapno ipalawagda no kasano a nasurok a PhP600 Milion manipud ken ni Sally Santos ti SYMS Construction ti naipaay iti Bulacan District Engineering Office. – Augie Arellano
