VIGAN CITY – Pinasingkedan ni Vigan City Mayor Juan Carlo Medina a paliiwenda pay nga umuna no nasayaat ti epekto ti pannakailukat ti turismo idiay Baguio City sakbay a malukatan ti turismo ditoy probinsia.
Iti pannaki-uman ti Bombo Radyo Vigan ken ni Medina, nakasagana ti siudad ti Vigan nga isu ti maysa kadagiti lugar ditoy probinsia a bisbisitaen ti kaaduan a turista no man bilang mailukat iti publiko tapno mapadur-as ti sektor ti turismo nga inapektaran ti Covid19 agsipud ta kasapulan kadagiti dumar-ay a dumalan nga umuna iti Covid19 testing tapno nataltalged ti panagpasiarda.
Inlawlawag ti mayor a saan nga agawat kadagiti aggapu iti sabali a rehion nangruna kadagiti lugar a narisgo iti Covid19 tapno masalwadan ti tunggal agindeg iti probinsia
Kabayatanna, pinasingkedan met ni Vigan City Tourism officer Edgar Dela Cruz a no malukatanton ti turismo iti siudad ket duagasut a turista nga aggapu kadagiti nadumaduma a lugar laeng iti probinsia ti makastrek iti inaldaw ken dumalanda iti travel agency a mangsiproseso kadagiti pagtalinaedan ken ti kaadda ti travel itinerary a nakailanadan dagiti mabalinda laeng a papanan.
Malimitaran dagiti pagpasiaran a malukatan a pakairamanan laeng ti Syquia mansion, Vigan City Heritage, Baluarte ken ti Dancing Fountain.
