VIGAN CITY – Saan unayen a nakaro iti epekto ti El Niño wennu tikag iti sektor ti agrikultura ta agtudtudon kadagiti sumagmamano a paset ditoy pagilian nga immunan a nagreklamo a nadadael iti produkto da gapu ti nabara a panawen.
Ti eksklusibo a pannaki-uman ti Bombo Radyo Vigan ken ni Agriculture Secretary Manny Piñol, maibasar iti naudi a monitoring da ket umabot iti lima a bilyon a pisos iti nadadael a produkto dagiti mannalon gapu ti tikag ngem saan unay a makaapekto iti national food production iti pagilian.
Kas iti gatad dagiti nadadael iti mula a pagay, segun ken ni Piñol, daytoy ket maysa a porsyento laeng iti epekto na iti national food production idinto a ti mais ket dua a porsyento laeng.
Nu pay kasta, namnamaen met ti agriculture secretary a nakasursuron dagiti tattao iti agdama a mapadpadasan iti pagilian isu a masapul a saganaan dan ton iti sumaruno a tikag.
Mainaig dayta ket trabtrabahoen dan iti pannakaipatungpal iti indiaya ti Israel a tulong ditoy pagilian nga adda iti maipatakder a solar-powered irrigation systems nga aggatad iti 50.5 bilyon a pisos.
