Insingasing ni Murang Kuryente partylist Rep. Arthur Yap nga aramaten ti electric bills a pagibasaran no asino ti nasken a matulongan iti baet ti krisis a mapaspasaran ita ditoy pagilian tapno mapaalisto ken saan a kasapulanen ti aglista ken pagpilaen dagiti tattao iti ayuda ti gobierno.
Segun ken ni Yap, makita iti electric bills no sino dagiti nasken a matulongan malaksid kadagiti poorest of the poor a libre a mangkonkonsumo laeng iti agingga 50 kilowatt hour.
Inlawlawag ti agpampanday-linteg nga iti agdama ket 27 milion a pagtaengan ti Pilipinas a ti 25 milion ket electric power consumer isu a nadaras a mabigbigda no asino dagiti naskenda a matulongan.
Innayonna pay a makita iti electric bill no asino dagiti konsyumer a makakonkonsumo iti 51 agingga 300 kwh ti koriente gapu ta dagitoy ti maaw-awagan a working class a masansan a mailaklaksid kadagiti ayuda ti gobierno.
