Nakemmeg ti dua nga indibidual iti naisayangkat a buy-bust operation iti siudad ti Vigan, Ilocos Sur idi kalman.
Dagiti suspek ket lalaki nga agtawen iti uppat a pulo ket maysa, Top 10 regional Target ken Top 6 regional target iti PDEA ISPO iti salinong ti Coplan “Den-Den nga agnaed iti ili ti Cabugao ken maysa a babai nga agtawen iti tallopulo ket siam , Street Level Individual nga agnaed iti ili ti San Juan.
Iti pannaki-uman ti Bombo Radyo Vigan ken ni PLt. Col. Reynaldo Mendoza Jr. iti Vigan City Police Station, datin nga adda rekord dagiti dua maipanggep iti droga iti ilida isu a nagtultuloy iti panangmonitor dagiti otoridad kadakuada a gappuanan iti pannakakemmegda.
Naala ti drug evidence kadakuada a nasurok-kumurang pito a gramo iti mapapati a shabu nga aggatad ti P47,600 a nakaipan iti dua a piraso iti heat-sealed transparent plastic sachets.
Dagiti non-drug evidence a naala ket pakairamanan ti maysa a piraso ti P500 a nagserbi a buy-bust money; tallo a piraso iti P500 a boodle money; pito a P1,000 boodle money; maysa a unit iti cellphone; maysa a piraso iti brown sling bag; maysa a pouch iti color rose gold; maysa a driver’s license; maysa a simcard package ken maysa a bassit a papel.
Iti agdama ket maisagsaganan ti kaso a maipila kontra kadagiti dua a suspek.
