VIGAN CITY – Agpada a dead on arrival iti ospital dagiti dua a motorista a nairaman iti aksidente ditoy probinsiya idi rabii ken itattay agsapa.
Maibasar iti impormasyon, alas dyes kinse idi rabii idi makidinnungpar ni Felipe Rendon Jr nga agtawen ti dua pulo ket dua nga agnaed idiay Bigbiga, Santiago a nagmaneho ti maysa a Honda Dio Scooter ti maysa a 14-wheeler truck a minaneho ni Arnel Naldo nga agtawen ti tallo pulo ket siyam a taga- Mabiga, Mabalacat, Pampanga.
Agpapa-abagatan ni Rendon idiay kalsada ti Barangay Poblacion Sur, Santiago idi mapapati nga inagaw na iti linya iti kinasinnabet na a ni Naldo isu a nagsagaba iti dunor iti ulo ken naduma-duma a paset iti bagi na a poon iti nakatayan na iti laksid a naitaray idiay Candon General Hospital, Candon City.
Kabayatanna, narumek ken awan nagbanbanagan na iti motorsiklo a nagluganan ni Darwin Duenas nga agtawen ti sangapulo ket pito nga agnaed idiay Villa Garcia, Sta. Cruz idi nakidinnungpar ti maysa a Partas bus a minaneho ni Albert Bilen nga agtawen ti uppat pulo ket maysa nga agnaed idiay Mabilbila Sur, Santa iti kalsada idiay Barangay Bayugao Oeste, Sta. Cruz.
Agpapa-amyanan ti bus idi dinungpar iti napaspas iti taray na a ni Duenas isu a naitapal iti sangwanan ti bus sa naipasirok ken naisagad-sagad iti sumagmamano a metro a nagsagabaan na iti dunor iti ulo ken naduma-duma a paset iti bagi a poon iti nakatayan na.
