VIGAN CITY – Dua iti nadunor ti napasamak a hit and run accident idiay Brgy. Quirino, Tagudin, Ilocos Sur a pakairaman ti Honda XRM ken Mitsubishi Expander.
Nabigbig iti drayber ti motorsiklo a ni Brix Zander Bernabe Ariola, agtawen iti sangapulo ket walo, residente ti Brgy. Baracbac, Tagudin, idinto a ti backride na ket agtawen iti sangapulo ket innem, residente ti Brgy. Jardin, Tagudin, agpada a saan a nakasuot ti helmet.
Ti met suspek ken drayber ti kotse ket ni Jeffrey Abad Casasola, agtawen iti uppat a pulo, residente ti Brgy. 22 San Andress, Laoag City, Ilocos Norte, awan lisensiyana ken adda physical disability na.
Iti pannaki-uman ti Bombo Radyo Vigan kenni Police Staff Sergeant Vladimir Lazo, agturong nga agpadaya ti motorsiklo idi kellaat a natukbob ida ti kotse a naglibas a nagturong met laeng iti daya a direksiyon.
Gapu dayta, tinawagan ti Tagudin Police Station dagiti asideg nga stasyon ti Probinsia ti La Union tapno ma-intercept ti kotse, ket dita a na-intercept ti Balaoan Municipal Police station ti nadakamat a lugan.
Segun kenni Lazo, naamuanda a ti suspek ket inlibasna laeng ti lugan ti asawana ta kayatna iti mapan idiay Cavite.
Iti agdama, mannarimaan pay laeng a matamtaming ti drayber ti motorsiklo iti Ilocos sur District hospital, idinto ti backrider a nagsagaba ti fractured iti makinkannawan nga imana ket naiyakar idiay regional medical center, san fernando City, La Union.
Innayon ni Police Staff Sergeant Lazo nga adda nagsaritaan ti drayber ti motorsiklo ken kabsat ti drayber ti kotse, a mangtedda iti financial a tulong.
Gapu ta awan iti helmet ken lisensiya ti drayber ti motorsiklo, naikkan ida ti ticket a panaglabsing ti municipal ordinance.
Kabayatanna, napakigtutan dagiti nagannak dagiti nakamotorsiko ta naglibasda a mapan pumasyar iti christmas village iti Tugudin.
Inlawlawag met ni Police Staff Sergeant Lazo a maibilang latta a hit and run ti aksidente ta adda umuna a stasyon a pag-surrenderan ti drayber ti kotse, ngem iti pay laeng Balaoan Municipal Police station ti nakakemmeganna.
