Dua a mangngalap, naalaw iti kabaybayan ti Santiago

Dua a mangngalap ti naalaw iti kabaybayan ti Ambucao, Santiago, a mapapati a nagtalinaed iti tengnga ti taaw iti uppat nga aldaw ken tallo a rabii.

Alas singko iti parbangon ti September 19 idi nagturongda iti taaw ta naggapuda idiay Bolinao, Pangasinan.

Iti pannaki-uman ti Bombo Radyo Vigan ken ni Police Major Henry Garcia, maysa met laeng a mangngalap ti nakaalaw kadakuada nga isu ti nangtulong a nangguyod iti bilogda.

Ti pannaka-stranded dagiti dua a mangngalap iti taaw ket gapu iti pannakatukkol ti maysa a makina nga inusarda.

Innayonna a nupay kayatda a makaawid ket saandan a nagtuloy gapu iti napigsa a dalluyon.

Iti agdama, mayur-uray met dagiti pamilia dagiti mangngalap nga umay mangsundo kadakuada.