Dua ti nakemmeg pakairamanan ti maysa a menor de edad idiay Barangay Nansuagao, Caoayan, Ilocos Sur gapu iti panagtakawda iti manok.
Dagiti suspek ket ni Rowelle Pacleb Abarquez, agtawen iti tallopulo ket dua, ken ti agtawen-iti-sangapulo ket innem a lalaki, estudiante nga agpada a tubo iti Barangay Paagan, Bacnotan, La Union ngem aggigyanda idiay Sitio Paa, Barangay Taleb, Bantay.
Dagiti akinkukua dagiti manok ket ni Rogelio Anicas Navarro, agtawen iti innem a pulo ket tallo, taga-Barangay Nansuagao, Caoayan.
Iti pannaki-uman ti Bombo Radyo Vigan ken ni Police Captain Giron Ancheta, nakangngeg dagiti karruba ti biktima iti uni ti taraok dagiti manok iti talon ken naduktalanda nga isaksako dagiti suspek dagiti manok.
Dagus met a nagresponde dagiti pannakabagi ti linteg ket naaktuan dagiti suspek nga agtaktakaw kadagiti manok a mapatta-patta a tallo agingga uppat.
Immuna a nakemmeg ti menor de edad idinto ta naglibas ti kaduana ngem nakemmeg met laeng babaen iti naiwayat a hot pursuit operation.
Iti agdama, maim-imbestigaran no adda pay immuna a tinakawan dagiti suspek.
