VIGAN CITY – Dua a drayber ti nadangran pakairamanan ti maysa a pulis iti aksidente iti national highway ti Barangay San Nicolas, Candon City, Ilocos Sur.
Ni Police Staff Sergeant Roland Garces Garabilez, agtawen iti uppat a pulo ket uppat, PNP member a naidestino iti Candon City Police Station, taga-Barangay Parioc 2nd ti nagmaneho iti Honda TMX 155 a motorsiklo.
Ti met Mio Sporty a motorsiklo ket minaneho ni Jenalyn Valdez Ancheta, agtawen iti sangapulo ket walo, backrider-na ni Lorenzo Reyes Paras, agtawen iti duapulo, agpada a taga-Barangay Paypayad, Candon City ken awan ti helmetda.
Agpapa-amianan dagti dua a lugan idin ta ti motorsiklo dagiti nagkalubbon ket nagsikkoda iti kannigid a saanda a nag-flasher.
Pinadas a lisyan ti motorsiklo a minaneho ti pulis ngem natukbobna latta ida a puon ti aksidente.
Gapu dayta, nadunor ti pingping ken dua nga ima ti nagmaneho iti TMX idinto a ti drayber met ti Mio ket nadunor ti akin-kannigid nga ima.
Saan met a naan-ano ti backrider.
