Dua manipud kadagiti tallo a nagkakalubbon iti motorsiklo ti natay iti napasamak nga aksidente iti provincial road ti Barangay Bantaoay, San Vicente, Ilocos Sur.
Dagiti natay ket dua a babai nga agtawen iti sangapulo ket siam a taga-Raois ken Pantay Daya, Vigan City idinto a ti lalaki nga isu ti nakalasat ket taga-Barangay Raois.
Iti pannaki-uman ti Bombo Radyo Vigan ken ni Police Captain Pedro Halover, Acting Chief of Police ti San Vicente Police Station, agpapa-abagatan ti motorsiklo iti provincial road iti nasao a barangay kangrunaan iti sumalog a paset ti rangtay idin saan a nakontrol ti drayber ti minanehona a motorsiklo ket naidungparda iti poste ti koriente ta mapapati a napaspas ti patarayda.
Gapu dayta, nagsagrap ti drayber ken dagiti kinalubbonna iti dunor iti nadumaduma a paset ti bagina ken naipaagasda iti ospital para iti pannakatamingda ngem naideklarar dagiti dua a babai a dead on arrival idinto nga agalen met ti lalaki ti nasakit a barukongna.
Dagiti tallo ket naggapuda a naki-birthday iti maysa a barkadada ken nakainomda idi napasamak ti aksidente.
