Patien ti Department of Social Welfare and Development a ti long term solution ti Walang Gutom Program ti gobierno.
Segun ken ni Assistant Secretary Irene Dumlao, agtultuloy ti panangipursigida tapno masulbar ti parikut iti involuntary hunger babaen iti nasao a programa.
Agtultuloy latta ti pannakikammayetda kadagiti partner agencies tapno mapapigsa ti long term impact ti WGP ta masapul a matulonganda dagiti benepisyaryo nga agbalin a paset ti ekonomia babaen iti whole-of-government approach.
Dayta ket babaen iti pannakikammayetda iti Department of Labor and Employment (DOLE) tapno matulongan dagiti household member a sumali kadagiti job fair ken training para kadagiti short-term courses katulonganda ti Technical Education and Skills Development Authority (TESDA).
Ti Walang Gutom program ti Marcos administrasyon ket adda 300,000 a benepisyaryona nga umaw-awat iti P3,000 a gatad ti food credits manipud iti DSWD.
