Namakdaar ti Department of Social Welfare and Development (DSWD) mainaig iti pananguyaw ken panangidumduma kadagiti Persons With Disabilities (PWD), nangruna dagidiay addaan iti autism ken dadduma pay a neurodevelopmental conditions.
Kinondenar ni DSWD Assistant Secretary ken Spokesperson Irene Dumlao ti pannakausar ti disability kas angaw wenno wagas tapno maala ti atension iti social media.
Impaganetget ni Dumlao nga adda karbengan dagiti PWD iti dignidad, respeto, ken proteksion ti pribado a biagda iti sidong ti linteg.
Indagadag ti DSWD kadagiti content creators nga agbalinda a responsable iti panagparnuay kadagiti materiales ken respetuen dagiti PWD ta ti pananguyaw ken panangtagibassit kadakuada ket madusa iti sidong ti Republic Act No. 9442.
