VIGAN CITY – Pinasingkedan ni Joel Escobar a driver ti mini bus a saan a nagovertake ti van a nangdungpar kadakuada idiay Brgy. Dan-ar, Santiago.
Iti pannaki-uman ti Bombo Radyo Vigan kenni Escobar, napaspas ti Toyota HiAce Van a nagturong ti kalsada a daldalyasatenda iso a pinadasna nga ilisi nga ipaigid ngem naidungpar lattan ti van iti minanehona a mini bus.
No saanna a napanunut nga ipaigid ti mini bus a minanehona ket posible a maysa isuna kadagiti pimmusay iti aksidente.
Immuna a tinawaganna iti akinkukua ti mini bus a minanehona sakbayna a pinakammuan ti pamilyana ket napalaos ti yamanna ta saan a napakarroan.
Ti agdama agpapalaing ni Escobar ti dunor a sinagabana iti aksidente idi napalabas nga aldaw idaiy Brgy. Dan-ar, Santiago no sadino maysa a barangay kagawad ti pimmusay.
