Nakapagpatangen dagiti dua a drayber a karaman iti napasamak nga aksidente iti national highway ti Barangay Paing, Bantay, Ilocos Sur.
Nabigbig ti nagmaneho iti Toyota Hi-ace Super Grandia a ni Jun Javier Perez, agtawen iti uppat a pulo ket walo, taga-Barangay VII, Vintar, Ilocos Norte.
Ti met nagmaneho iti Yamaha Mio Sporty ket ni Jerry Bernese Vasquez, agtawen iti duapulo ket uppat, taga-Barangay Bacsil, Dangdangla, Bangued, Abra.
Iti pannaki-uman ti Bombo Radyo Vigan ken ni Police Captain Donaldson Pagalanan iti Bantay Police Station, natukkol ti ramay ti ima ken sakana ti drayber ti motorsiklo a naipaagas iti ospital ken natakuatan a nakainom idi mapasamak ti aksidente.
Agpapa-abagatan ti van idinto nga agdaldalyasat iti bangir a linya ti motorsiklo, ket idi madanon ti nakapasamakan ti aksidente, kangrunaan iti kurbaan a paset ti kalsada, nag-overshoot ti motorsiklo isu a napan iti bangir a linya isu a nagdinnungparda.
