VIGAN CITY – Imbutaktak ti drayber ti kurong-kurong ken suspek ti panagtakaw iti pito a semento iti pagub-ubraanna a construction site ken karaman iti aksidente iti national highway ti Barangay Bannuar, San Juan, Ilocos Sur nga adda uppat a kakaduana.
Karaman pay iti aksidente ti Hyundai Starex van ken Toyota Yaris Cross.
Ti nagmaneho ti kurong-kurong ket agtawen iti uppat a pulo ket lima, constrction worker, taga-Barangay Nagsuputan, San Juan.
Ti Toyota Yaris Cross ket minaneho ni Marc Laurence Callena Balubar, agtawen iti tallopulo, Court Financial Aid Officer, taga-Palao, Bangued, Abra.
Ti met Hyundai Starex van ket minaneho ni Walter Tabaldo Avecilla, agtawen iti tallopulo ket innem, taga-Barangay Immayos Sur, San Juan.
Maipalagip nga idi napasamak ti aksidente, agpapaabagatan ti Toyota Yaris Cross ken to kurong-kurong idin ta nagpreno ti Yaris Cross ket natukbob daytoy ti kurong-kurong a sumarsaruno kenkuana ken nasagidna ti nakaparking a van iti laud a paset ti outer lane.
Iti pannaki-uman ti Bombo Radyo Vigan kenni Police Lieutenant Reynald Ramos ti San Juan Municipal Police Station, nangisayangkatda iti imbestigasyon ket tinawaganda ti pagub-ubraan ti drayber ti kurong-kurong, isu a dagus met a nangisayangkat ti inventory ti construction site a nakatakuatanda nga adda agkurangda ti pito a bags ti semento.
Sakbay ti napasamak a panagtakawan, nagi-inom ti suspek ken kakaduana iti construction site ket kalpasan dayta, nagikarga ti suspek iti semento nga iyawidna iti pagtaenganda.
Basar iti suspek, usarenna iti tinakawna a semento a pag-flooring na iti baboyanna.
Segun kenni Police Lieutenant Ramos, nakasaganan dagiti dokumento para iti panagipilada iti kaso, ken madama a maim-imbestigaran dagiti kakaddua ti suspek, ta no mapaneknekan nga adda partisipasyonda iti nasao a panagtakawan ket karamanda a mapilaan ti kaso.
