Pimmusay bayat a matamtaming ti maysa a drayber ti motorsiklo a naaksidente iti national highway idiay Barangay Libtong, Tagudin, Ilocos Sur.
Nabigbig ti pimmusay a ni Richard Sepin Garcia, agtawen iti duapulo ket dua, funeral helper, taga-Barangay Ranget, Tagudin, backrider-na ti maysa a menor de edad a taga-Barangay Dardarat iti nasao nga ili, agpadada a nakainom.
Ti met drayber ti Isuzu Elf ket ni Levi Agcalis Day-em, agtawen iti uppat a pulo ket6 innem, inluganna ni Hazzan Castillo, agtawen iti tallopulo ket innem, OFW, agpada a taga-Lumaba, Villaviciosa, Abra.
Nairaman pay ti insidente ti maysa a kurong-kurong a madama a bigbigbigen pay laeng dagiti pannakabagi ti linteg no asino ti nangimaneho.
Iti pannaki-uman ti Bombo Radyo Vigan ken ni Police Major Kleyvan Paycao Dalang, agpapa-abagatan ti trak idinto nga adda iti bangir a linya ti motorsiklo, ket idi madanonda ti nakapasamakn ti insidente, bimmallasiw ti kurong-kurong.
Nagpreno ti trak tapno lisyan ti panagdinnungparda iti kurong-kurong, ngem ti met motorsiklo ket napan iti agpa-abagatan a linya isu a nagdinnungparda ti trak.
Nadunor ti nadumaduma a paset ti bagi dagiti naglugan iti motorsiklo a naipaagas iti ospital ngem saanen a nakalasat ti drayber.
Saan met a naan-ano dagiti naglugan iti trak ngem adda dadael iti paset ti luganda.
