VIGAN CITY – Namuelta ti drayber ken pahinante nga iligal a nagipastrek kadagiti nadumaduma a meat products a nasalamaan ken nagpasuksok kadagiti animal quarantine officer iti animal quarantine checkpoint idiay Brgy. Bio, Tagudin.
Iti pannaki-uman ti Bombo Radyo Vigan ken ni Provincial Quarantine Officer Martel Quitoriano, kompleto ti dokumento dagiti nasao a kontrabando a kukua ti maysa a dakkel a panganan idiay Ilocos Norte ngem gapu ta mapapati nga agkasapulan dagiti nagipastrek ket pinadasda a pasuksukan dagiti agbambantay iti checkpoint tapno maipastrek iti probinsia dagiti kontrabando.
Saanen a napilaan iti kaso a bribery ti suspek gapu ta awan ti ebidensia a maipakita agsipud ta saan nga inawat ti nakabantay iti checkpoint ti kuarta a naiyawat kenkuana.
Kabayatanna, sangagasut a ribo a pisos a gatad ti nasurok maysa a tonelada a whole dressed chicken a naikarga iti trak ti nasalamaan iti animal quarantine checkpoint idiay Brgy. Gabur, Sta. Cruz.
Ti trak ket minaneho ni Jason Palabay Valdez, agtawen iti tallopulo ket pito nga agnaed idiay 81 Camdas Subd. Baguio City, Benguet ken ti kaduana a drayber a ni Daniel Oyam Dangilan, agtawen iti uppat a pulo nga agnaed idiay Butac, Natonin, Mt. Province.
Awan ti naiparang dagiti nagipastrek a dokumento kadagiti produkto, saan nga accredited ti luganda nga agipastrek ken saanda a nagpainspeksyon.
Pinalagipan ni Quitoriano a saan a mabalin nga ibiahe dagiti nasao a produkto no saan a freezer van ti nakaikargaanna ken nagballaag kadagiti iligal nga agipaspastrek kadagiti kontrabando ditoy probinsia.
Nupay kasta, naipanen iti Provincial Veterinary Office – Vigan City dagiti nasao a kontrabando para iti proper disposition.
