Imbes a kumita, ket nalugi pay dagiti dadduma a drayber ti jeep a simmali iti Service Contracting Program ti Department of Transportation ken Land Transportation Franchising and Regulatory Board a naipatungpal idi Abrill 15.
Iti salinong ti programa, dagiti sumali a jeepney driver ken operator ket kasapulan a mangted iti 20 percent fare discount kadagiti amin a pasahero dagiti public utility vehicle iti pagilian.
Gagem ti programa a matulongan dagiti commuter ken drayber gapu iti nangina a presio ti petrolyo.
Ngem segun ken ni MANIBELA Chairman Mar Valbuena, adda dagiti immasideg kenkuana a drayber ti jeep ket kunada nga awan ti masapulanda iti panagsalida iti programa.
Kunana a nangina unay ti 20 percent discount kadagiti amin a pasahero agraman pay ti 20 percent discount kadagiti senior citizen, Person with Disability, ken dagiti estudiante.
