Impasigurado ti Department of Transportation (DOTr) ti agtultuloy a pannakaipatungpal dagiti dadakkel a proyekto iti transportasion.
Daytoy ket kalpasan a napagsasaritaan dagiti plano ken solusion iti umuna a Cabinet meeting iti 2025.
Karaman kadagiti napagsasaritaan ket dagiti 16 a flagship infrastructure projects ti DOTr kas iti North-South Commuter Railway (NSCR), Metro Manila Subway Project, ken dadduma pay.
Segun kenni Transportation Secretary Jaime Bautista, naipaganetget ti meeting ti kinapateg ti railway project, kasta met dagiti karit a mangapektar iti pannakaipatungpalna.
Kas iti right-of-way acquisition, pannakaiyakar dagiti naapektaran, pondo, ken dadduma pay nga isyu ti daga ken utilities.
Nupay adda ti pannakakissay ti badyet ti DOTr iti 2025, impanamnama ni Bautista a maituloy dagiti proyekto babaen ti panangusar iti loan proceeds manipud kadagiti development partners.
