VIGAN CITY – Inpasigurado ti National Disaster Risk Reduction and Management Council (NDRRMC) a saan to a makurimes dagiti donasyon para iti rehabilitasyon ti Itbayat, Batanes.
Ti pannaki-uman ti Bombo Radyo Vigan ken ni NDRRMC- Office of the Civil Defense spokesman Mark Timbal, dagiti donasyon a naggapu kadagiti local a gobyerno ken uray kadagiti pribado a grupo ken tattao a naipadalan iti gobyerno ket maurnong ken maymaysa iti pakaidulinan na.
Kinunana, santo laeng mausar dagiti naurnong a donasyon nu malpasen iti comprehensive damage assessment iti namsaakan iti gingined iti nasao a lugar.
Inlawlawag na a nu adda dagiti pribado nga indibidwal wennu grupo a mapan a mismo mangted iti donasyon kadagiti biktima iti gingined, saanen a sakop ti gobyerno iti nasao a banag.
Kabayatanna, kinumpirmaran iti opisyal nga immaboten iti nasurok lima pulo ket uppat a milyon a pisos iti gatad dagiti nadadael idiay Itbayat gapu ti gingined ken uray dagiti pamilya a naapektaran ket immabot payen iti nasurok a sangaribo.
