Pinalagipan ti Department of Labor and Employment dagiti employer nga iruar ti final pay ken certificate of employment dagiti employee-da iti husto nga oras, kalpasan a nagbalin a kangrunaan a parikut idi napan a tawen dagiti saludsod mainaig iti final pay.
Maibasar iti DOLE, sagudayen iti Labor Advisory No. 06 series of 2020 a nasken nga ited ti employer ti final pay ti empleado iti uneg ti 30 nga aldaw sipud nakapanaw iti kompania, malaksid laeng no adda nasaysayaat pay a patakaran.
Karaman iti final pay ti saan pay a nabayadan a sueldo, pro-rated 13th month pay, separation wenno retirement pay, cash for unused leaves, tax refund ken dadduma pay a benepisio maibasar iti patakaran wenno katulagan ti kompania.
Nasken pay a mangted ti employer iti COE iti uneg ti 3 nga aldaw manipud nagkiddaw ti empleado.
Nagballaag ti Labor Secretary Bienvenido Laguesma a dagiti employer a mangitantan wenno mangig-iggem iti final pay ken employment records a saan a sumursurot iti linteg ket mabalin a sumango iti pannusa.
