Awan pay ti naawat ti Department of Justice a kopya ti referral wenno complaint kontra kada dati nga Ateneo Men’s Basketball head coach Tab Baldwin.
Kasaruno daytoy ti panangibaga ti Philippine National Police – Criminal Investigation and Detection Group nga insingasingda iti DOJ a mangisayangkat iti preliminary investigation iti mapapati a panaglabsing iti Anti-Hazing Act da Baldwin ken dadduma pay nga adda pakainaiganna iti pannakatay dagiti 2 nga estudiante idiay Dipaculao, Aurora.
Segun ken ni DOJ Spokesperson Atty. Polo Martinez a saan pay a sigurado no aktwal a complaint daytoy ken no ania nga oras a naipatulod kadakuada.
Immunan a pinasingkedan ni Interior Secretary Jonvic Remulla nga ita nga aldaw ket naipatulod iti DOJ ti resulta ti findings-da iti pannakatay da Rene Baterbonia ken ni Divine Adili.
