Inallukoy ti Department of Health ti publiko a gundawayan ti outpatient dental benefits ti Philhealth nga aggatad iti agingga P1,000 kada miembro kas paset iti primary care package.
Impaganetget dagiti opisial ti DOH a napateg ti preventive dental care ta nasakit, nagastos, ken narigat nga agasan dagiti advanced a parikut iti ngipen.
Segun ken ni DOH Usec Dr. Emmie Liza Perez-Chiong, nasaysayaat no agpakita iti dentista dua a daras iti kada tawen.
Maal-allukoy pay dagiti nagannak nga ipan a dagus iti dentista dagiti ubbing no agtubon ti umuna a ngipenda tapno nasapa a maikabil ti husto a dental habits.
Sakup ti Philhealth dental benefit dagiti 2 a dental cleaning kada tawen, dental checkup, fluoride application para kadagiti ubbing ken nataengan, ken pit ken fissure sealants tapno maliklikan ti pannakadadael ti ngipen uray no awan pay ti binukbokna.
