VIGAN CITY- Sagsaganaan ti Department of Health iti depensa da kontra kadagiti ebidensiya dagiti biktima ti kontrobersyal nga anti-dengue vaccine a Dengvaxia isu nga insingasing da ken ni Presidente Rodrigo Duterte nga adda iti tallo a foreign expert a mangadal iti nasao a bakuna, dayta iti buwelta ni Atty. Persida Rueda-Acosta, mangidaulo ti Public Attorney’s Office iti damag nga addan iti uppat a pagpilyan iti presidente nu siasino ti mangbukel ti three-man panel a binukel na idi bulan ti Mayo.
Ti pannaki-uman ti Bombo Radyo Vigan ken ni Atty. Acosta, inulit na nga inbaga nga awan iti serbi na iti mabukel a three-man panel of experts ta mismon a ti manufacturer ti dengvaxia a Sanofi Pasteur iti nangibaga a saan a mabalin a maibakuna kadagiti saan pay a nadengue iti inaramid da nga anti-dengue vaccine.
Kinunana, uray nu addan ton iti mapili iti presidente a foreign expert a mangadal iti nasao a bakuna, saan nga agsardeng ti PAO kadagiti ar-aramiden da a forensic examination, autopsy ken dadduma pay a panangtulong da kadagiti biktima kas iti panangasisst da kadakuada nu mapan da agipila ti kaso kontra kadagiti rumbeng na a makasoa inaig iti nasao nga isyu.
Inpaganetget ti PAO chief a nu bilang malusutan dagiti akusado dagiti reklamo kontra kadakuada inaig ti dengvaxia issue, saan met a matmaturog ti Dios a Namarsua tapnu saan na a Makita dagiti dakes nga aramid da.
