Dinayaw ti Department of National Defense (DND) dagiti soldado a pinilida a tungpalen dagiti mandatoda para iti pagilian, tapno masigurado a natalged ken nakappia iti panangisayangkat ti paskua.
Segun kenni Defense Sec. Gilberto Teodoro Jr, ita a marambakan iti pannakaipasngay kenni Kristo a simbolo ti namnama, nasken a panunoten dagiti bendisyon a naawat ken ibingay kadagiti pada a tao nga agkasapulan.
Innallukoyna pay dagiti Pilipino a pagtalinaeden ti kaipapanan ti “Bayanihan” nangruna ita nga adu dagiti tattao ti sumangsango ti pannubok gapu dagiti didigra.
Kinniddaw pay ni Teodoro iti publiko nga ikararagan dagiti soldado a pinilina a bantayan ken protektaran ti wayawaya ken kappia iti laksid ti kinaadayoda iti pamilyada.
Ti sakripisyoda ket agserbi a palagip ti panagayatda iti pagilian ken panagkaykaysa kangrunaan no panawen a sumangsango ti pagilian iti karit ti seguridad ken soberanya.
