Nagyaman ti Department of Migrant Workers iti gobierno ti United Arab Emirates ken kadagiti pagilian nga umaw-awat kadagiti Pilipino iti Middle East gapu iti panangipasiguradoda iti kinatalged ken seguridad dagiti OFW iti baet ti rinnupak iti rehion.
Pinasingkedan dayta ni DMW Secretary Hans Leo Cacdac kasaruno ti natalged a pannakapaawid dagiti 299 a Pinoy a naggapu idiay Dubai idi kalman iti agsapa.
Idi kallabes ket nadakamat ni Presidente Ferdinand Marcos Jr a nasurok 1,000 a Pilipino ti nagkiddaw a mapaawid iti baet ti agtultuloy a rinnupak iti Middle East.
Impasigurado met ni Cacdac nga agtultuloy ti pannakibinnulig ti DMW ken Overseas Workers Welfare Administration kadagiti dadduma pay nga ahensia ti gobierno tapno mangted tulong kadagiti Pilipino iti Middle East a naapektaran iti riribuk.
