Awan ti indikasyon nga adda sensitibo wenno confidential nga impormasyon iti gobierno ti nakompromiso kasaruno iti naipakaammo a panag-deface iti opisyal a website iti Kamara de Representantes idi Sabado kas pinasingkedan ti Department of Information and Communications Technology (DICT).
Segun ti DICT, insigida a nakikammayet iti Kamara babaen ti National Computer Emergency Response Team tapno tignayan ti insidente.
Nakatutok dagiti otoridad ti panang-contain iti insidente, panangpasubli kadagiti apektado a serbisyo ken panangbigbig iti nagtaudan ken kalawa iti saan nga authorized access.
Makikamkammayet payen ti ahesnya kadagiti law enforcement agency para iti naun-uneg nga imbestigasyon, panagsubli iti serbisyo, ken panangpapigsa ti cybersecurity measures tapno maliklikan ti kas iti nasao nga insidente iti masangwanan.
Impaganetget ti DICT a ti website defacement ket panaglabsing ti Cybercrime Prevention Act of 2012 ken madusa dagiti mapaneknekan nga adda iti likodan ti insidente.
