Impatungpal ti Department of Education (DepEd) ti naing-inget a pagannurotan tapno tignayan dagiti panaglabsing iti seguridad iti uneg dagiti pagadalan.
Maibilang ita a nadagsen a basol nga adda kabatoganna a disciplinary action dagiti bomb threat ken panangitugod kadagiti deadly weapon.
Segun ti DepEd, gagem ti addang a masalakniban ti pagsayaatan dagiti agad-adal kalpasan dagiti kinaranggas kadagiti pagadalan.
Iti salinong iti napagtipon a framework, ti bomb threat ken ti panangitugot ti deadly weapon iti uneg ti pagadalan wenno kadagiti aktibidad iti pagadalan ket maibilang a third-level offense, nga isun ti kangatoan ken kakaroan a kategorya iti panaglabsing.
Iti first-level offense met kas ti panagsarita kadagiti bastos wenno agkakadakes a sarita iti uneg ti pagadalan, simple a vandalism, nagulo nga ugali, ken panagiwaras iti madi nga impormasyon a mabalin nga agresulta iti pakaallilawan wenno gulo, ti estudyante ket dumalan iti written reprimand, mapaayaban dagiti nagannakna ken mabalin a masuspenso.
Ti second-level offense met wenno paulit-ulit nga ugali a nakarkaru ngem iti simple a panaglabsing, pakairamanan ti stalking, slight physical injuries, panagtakaw, panangbutbuteng ken panag-harass ket adda dusa a mandatory suspension iti umuna a panaglabsing, non-readmission iti maikadua a panaglabsing ken exclusion iti maikatlo a panaglabsing.
Ti third-level offense kas ti hazing, pammapatay ken sexual assault ket kabatoganna ti nadagsen a pannusa nga administratiubo kas ti non-readmission wenno exclusion, kagiddan ti otomatiko a panag-endroso kadagiti otoridad ken kadagiti rumbeng nga ahensia para iti mayannatup nga addang iti linteg ken intervention.
