VIGAN CITY – Plamplanwen ti Department of Agriculture a mangipaay inton Setyembre iti nakurang PHP12B a cash aid tapno tulongan dagiti mannalon iti irik kadagiti kasapulanda.
Mangted ti DA iti sag-lima ribo a pisos kadagiti 2.4 milion a rice farmer a kwalipikado a benepisyaryo iti salinong ti Rice Farmers Financial Assistance program, napondoan manipud iti excess tariff collections manipud iti panagangkat iti bagas.
Iti salinong ti Rice Tariffication Law, mangilatlatang ti gobierno iti PHP10B kada tawen manipud iti tariff revenues para iti Rice Competitiveness Enhancement Fund a ti gagemna ket pondoan ti pannakaipaay ti high-yielding seeds, pasayaaten dagiti mannalon babaen iti nadumaduma a training sessions, panangipaay iti farm machinery, ken panangidiaya iti credit support.
Ti aniaman a sobrana ket mabalin nga aramaten para iti RFFA ken dadduma pay a program a mangtulong kadagiti rice farmer.
