Natay ti maysa a dentista ken maysa a mangisursuro iti pammaltog iti maysa a pananganan idiay Zone 6, Bangued, Abra itay alas singko trentay otso iti malem, March 26, 2025.
Dagiti biktima ket da Dr. Francisco Beleno Beria a maysa a dentista ken Odilon Peru Peria, teacher by profession iti Abra High School ken agnaed idiay Zone 3 iti nasao nga ili idinto a ti suspek ket saan a nabigbig.
Iti panagresponde dagiti kameng ti Bangued Municipal Police Station, naipanen ni Peria iti Seares Memorial Hospital ngem naideklarar a dead on arrival gapu iti sinagabana a tallo a gunshot wounds a maysa iti likodna nga isu ti point of entry ken dua iti point of exit iti akin-kannigid a paset ti barukongna ken maysa pay a gunshot wound iti akin-kannigid nga imana.
Ni met Dr. Beria ket nagsagaba iti gunshot wound iti ulona a rason ti insigida a pannakatayna.
Sakbay iti pammaltog ket nakatugaw ni Peria iti asideg iti bakod iti panganan kaduana ni Charlon Guliban Blaquera, agtawen iti tallopulo ket walo, mangisursuro met laeng iti Abra High School nga agnaed idiay Zone 6, Bangued, Abra idinto a ni Dr. Beria ket agmaymaysa a nakatugaw iti kabatogda a lamisaan.
Apaman a dimteng ti suspek a nakahelmet ket inasitganna ni Peria nga isun ti nangpaltoganna iti namin-uppat a daras ken nakatamaan met ti ulo ni Beria.
Insigida a naglibas ti suspek kalpasan ti pammaltog a gappuanan ti panangisayangkat dagiti otoridad ti hot pursuit operation.
